Kandidatja më e re e Partisë Socialiste në qarkun e Fierit, Zegjine Çaushi, po rezulton një nga emrat më të votuar me preferencë në këto zgjedhje të 11 majit.
Zegjine Çaushi është 26 vjeçe, vjen nga fshati Vlosh i Roskovecit dhe ka kryer studimet në Fakultetin e Drejtësisë me rezultate të shkëlqyera. Ajo është licencuar si avokate.
Edhe pse u duk se Çaushi ishte në rrugën drejt Kuvendit, me numërimin e kutive të tjera, mesa duket shanset për të marrë një mandat janë zvogëluar. Kjo pasi Zegjine Çaushi ka kaluar në vend të tetë në listë dhe PS në Fier nxjerr vetëm 7 kandidatë nga lista e hapur.
Në një intervistë për Top Channel, ajo foli për fushatën dhe për komunikimin që pati me Gazment Bardhin.
Ajo pranon se në fillim ishte e pasigurt për rezultatin që mund të arrinte, por përmend emrin e Bardhit si faktor që e motivoi.
“Ai ndoshta e nisi për të më ulur, por më dha më shumë forcë. Nga fushata që bëra në rrjete sociale, mora mbështetje të jashtëzakonshme.”
Me Bardhin, shton Zegjineja, ka komunikuar vetëm përmes videove, ndërsa nuk ka pasur përballje fizike mes tyre. Me ironi ajo thotë:
“Mendoja se do vinte në ndonjë KZAZ, por me atë rezultat që mori, as në Fier nuk është bërë gjallë më.”
Mbetet për tu parë nëse Zegjineja do të hyjë në Kuvend apo jo. Në Fier janë numëruar 482 nga 587 kuti në total për votat preferenciale.
