Arsenal ka marrë një fitore të rëndësishme 2-0 ndaj Evertonit, duke ruajtur ritmin në krye të Premier League dhe duke e çuar diferencën në 10 pikë nga Manchester City. Skuadra londineze vuajti shumë për të thyer rezistencën e kundërshtarit, por në fund gjeti dy gola të vonë që vulosën suksesin në “Emirates Stadium”.
Evertoni zhvilloi një ndeshje të mirë dhe në pjesën e parë ishte pranë golit me Dwight McNeil, i cili fillimisht u ndal nga një ndërhyrje e shkëlqyer e Riccardo Calafiorit, ndërsa më pas goditi edhe shtyllën me një tentativë nga distanca. Edhe Arsenal pati pretendime për penallti pas një kontakti mes Michael Keane dhe Kai Havertz në zonë, por loja vazhdoi.
Kur gjithçka po shkonte drejt barazimit, Arsenal goditi në minutën e 89-të. Zëvendësuesi Viktor Gyokeres përfitoi nga një dalje e gabuar e Jordan Pickford pas një krosimi të Max Dowman dhe shtyu topin në rrjetë për 1-0.
Në minutat shtesë, Everton hodhi të gjithë lojtarët përpara në kërkim të barazimit, përfshirë edhe portierin Pickford në një goditje këndi. Por Arsenal e shfrytëzoi në mënyrë perfekte hapësirën e lënë mbrapa. Max Dowman kaloi dy mbrojtës, doli i vetëm përpara portës bosh dhe shënoi golin e dytë, duke vulosur fitoren dhe duke hyrë në histori si golashënuesi më i ri ndonjëherë në Premier League.
Me këtë realizim, Dowman, në moshën 16 vjeç e 73 ditë, theu rekordin e vendosur nga James Vaughan i Evertonit në vitin 2005. Një mbrëmje perfekte për Arsenalin, që fitoi tri pikë të mëdha dhe njëkohësisht pa lindjen e një rekordi historik.
