Arsenali i Londrës po bën një përpjekje të vendosur për të siguruar shërbimet e sulmuesit nigerian të Galatasarayt, Victor Osimhen. Transferimi i sulmuesit 27-vjeçar është vendosur si një nga prioritetet kryesore nga vetë trajneri i Gunners, Mikel Arteta.
Drejtuesit e klubit anglez janë të bindur se mund ta finalizojnë marrëveshjen përpara mbylljes së merkatos aktuale. Gjigantët turq ende nuk kanë përcaktuar një çmim fiks për sulmuesin e tyre të shumëkërkuar, por raportohet se klubi nga Stambolli kërkon të paktën të rikuperojë investimin fillestar prej rreth 70 milionë eurosh.
Vlen të theksohet se Victor Osimhen e kaloi sezonin 2024/25 te Galatasaray në formë huazimi, përpara se të transferohej përfundimisht nga Napoli te klubi turk në verën e vitit 2025. Në sezonin 2025/26, sulmuesi nigerian luajti në 33 ndeshje në të gjitha kompeticionet për klubin nga Stambolli, duke shënuar 22 gola dhe dhënë 8 asistime. Sipas Transfermarkt, vlera aktuale e tregut e lojtarit është 75 milionë euro.
