Anglia nuk shkoi më shumë se një barazim pa gola ndaj Ganës, në një ndeshje të zbehtë ku skuadra e Thomas Tuchel dominoi me top, por nuk arriti të gjente rrugën e rrjetës.
Carlos Queiroz arriti të neutralizojë yjet anglezë, me Jude Bellingham, Anthony Gordon dhe Harry Kane që nuk patën ndikimin e pritur. Për mesfushorin e Real Madridit ishte një mbrëmje për t’u harruar, pasi mbeti jashtë ritmit dhe u zëvendësua në pjesën e dytë.
Anglia kishte kontrollin e plotë të lojës, me 78.7% mbajtje topi dhe 19 goditje në total, por vetëm katër prej tyre përfunduan në kuadrat. Pavarësisht epërsisë së madhe, “Tre Luanët” u treguan të pafuqishëm në momentet vendimtare.
Rasti më i mirë erdhi në fund, kur O’Reilly goditi shtyllën me kokë dhe topi shkoi te Kane. Sulmuesi anglez, i vetëm në zonë, nuk arriti të finalizonte dhe dërgoi topin mbi traversë, duke simbolizuar mbrëmjen e vështirë të Anglisë.
Nga ana tjetër, Gana mori një pikë shumë të rëndësishme dhe tashmë është pranë kualifikimit. Anglia, ndërkohë, humbi mundësinë për të marrë kreun e grupit dhe do të duhet të tregojë shumë më tepër në ndeshjen e fundit.
