Bashkia e Durrësit ka nxjerrë një njoftim paralajmërues për përkeqësim të motit ditën e premte, bazuar në të dhënat e Shërbimit Meteorologjik Ushtarak.
Sipas parashikimeve, qyteti pritet të përballet me reshje të dendura shiu, shtrëngata dhe erëra të forta, kushte që mund të sjellin problematika të ndryshme.
Ky paralajmërim vjen vetëm një muaj pas përmbytjeve që goditën Durrësin, duke shkaktuar dëme të shumta materiale në banesa dhe vështirësi për dhjetëra familje.
Në këtë kuadër, autoritetet u bëjnë thirrje qytetarëve të shmangin lëvizjet e panevojshme dhe të tregojnë kujdes maksimal gjatë qarkullimit me automjete.
Po ashtu, rekomandohet marrja e masave për sigurimin e objekteve në hapësirat e jashtme, për të shmangur dëme të mundshme.
Bashkia e Durrësit njofton se ndodhet në gatishmëri të plotë, ndërsa strukturat e emergjencave, ndërmarrjeve dhe policisë bashkiake janë në terren.
Autoritetet theksojnë se do të jenë të angazhuara maksimalisht për t’iu ardhur në ndihmë qytetarëve dhe familjeve në çdo situatë problematike që mund të paraqitet.
