Aktivisti Andi Tepelena i ka bërë thirrje publike drejtësisë, deputetëve dhe partive politike nga protesta e 37-të para kryeministrisë për dorëheqjen e Edi Ramës.
Ai i është drejtuar Prokurorisë së Posaçme për hetimin e dosjes së quajtur “Albanian Files”, që ai i cilëson si dosja ku “përmblidhet i gjithë krimi i Edi Ramës”.
Ai iu drejtua edhe Kuvendit duke kërkuar shfuqizimin e dy komisioneve të rëndësishme, atij të Reformës Zgjedhore dhe atij të Reformës Territoriale, të cilat i cilësoi si “komisione të pengmarrjes së demokracisë”.
Tepelena i bëri thirrje deputetëve të Partisë Socialiste dhe opozitës për dorëheqje dhe djegien e mandateve, duke ndjekur shembullin e deputetet Marjana Koçeku.
Aktivisti Andi Tepelena: I bëj thirrje SPAK-ut, kemi dorëzuar dosjen “Albanian Files”, aty përmblidhet i gjithë krimi i Edi Ramës, të gjitha ligjet antishqiptare dhe gjithçka që ka nxjerrë në dëm të Shqipërisë. SPAK, vepro! SPAK, çfarë bëni me ato 3 mijë dosje? Çfarë bëni me Belinda Ballukun? Bëjeni publike atë dosje. Bëjeni transparente për shqiptarët.
Parlamenti i krimit është momenti që Parlamenti shqiptar të zhbëjë ato dy komisione: Komisionin Zgjedhor dhe Komisionin e Reformës Territoriale. Ato janë komisione të pengmarrjes së demokracisë, zhbëjini ato komisione. Sa herë jeni mbledhur, keni bërë vetëm pazare në kurriz të demokracisë. Keni bërë Kodin Zgjedhor siç keni dashur, keni bërë pazare për interesat tuaja dhe jo për interesin publik. Hiqini, zhbëjini komisionet.
Është momenti që deputetët e Partisë Socialiste t’i thërrasin mendjes. Është momenti të japin dorëheqjen, të ndjekin shembullin e Mariana Koçekut dhe të dalin të pavarur, të largohen nga ajo parti nëse duan të tregojnë përgjegjshmëri në këtë moment historik. Është momenti ta braktisin në fatin e tij më të turpshëm Edi Ramën, digjini mandatet dhe largohuni.
Është momenti që e gjithë opozita ta zhbëjë atë parlament, është i delegjitimuar. Nuk ka më vlerë, nuk përfaqëson më qytetarët shqiptarë. Një Shqipëri e re po vjen.
