Një aksident ka ndodhur në aksin rrugor Lushnjë–Berat, pranë Urës së Kuçit në Çukas, ku një automjet ka dalë nga rruga dhe ka përfunduar në kanalin anësor.
Nga aksidenti ka mbetur i plagosur drejtuesi i mjetit, një shtetas i huaj, Smarsuel Gurezi, 32 vjeç, i cili mësohet se është pastor.
Sipas informacioneve paraprake nga vendi i ngjarjes, automjeti tip “Dacia” ka dalë nga rruga dhe është përmbysur në kanal. Fatmirësisht, kanali nuk kishte ujë, çka shmangu një rrezik më të madh për 32-vjeçarin.
Për shkak të përmbysjes, dyert e automjetit u bllokuan dhe drejtuesi mbeti i bllokuar brenda.
Për nxjerrjen e tij u desh ndërhyrja e forcave zjarrfikëse, të cilat prenë pjesë të llamarinës së makinës dhe bënë të mundur nxjerrjen e të plagosurit.
32-vjeçari u transportua në spitalin e Lushnjës për të marrë ndihmë mjekësore dhe, sipas informacioneve të para, ndodhet jashtë rrezikut për jetën.
