Një aksident i rëndë ka ndodhur në aksin rrugor Fier–Lushnjë, pranë fshatit Vajkan, ku dy automjete janë përplasur me njëra-tjetrën dhe më pas kanë përfunduar në kanalin anësor të autostradës.
Si pasojë e përplasjes, katër persona kanë mbetur të plagosur dhe janë transportuar me urgjencë në Spitalin Rajonal të Fierit. Sipas të dhënave paraprake, të lënduarit ndodhen jashtë rrezikut për jetën.
Aksidenti ka shkaktuar bllokimin e njërës prej korsive të rrugës, duke krijuar radhë të gjata automjetesh në këtë segment, i cili gjatë sezonit veror përballet me fluks të lartë qarkullimi.
Në vendngjarje ndodhen shërbimet e Policisë, të cilat po punojnë për zbardhjen e rrethanave dhe shkaqeve të aksidentit, si edhe për normalizimin e qarkullimit në zonë.
