Prokurori i SPAK, Adnan Xholi, është kandidati i parë që ka zyrtarizuar interesin për postin e Prokurorit të Përgjithshëm.
Ai ka dorëzuar aplikimin pranë Këshillit të Lartë të Prokurorisë (KLP), duke hyrë kështu në garën për drejtimin e organit qendror të akuzës.
Xholi nuk është një emër i ri në garat për poste drejtuese në sistemin e drejtësisë. Ai ka kandiduar më herët dy herë për drejtues të Prokurorisë së Posaçme (SPAK), ndërsa ka mbajtur edhe funksionin e drejtuesit të Seksionit Kundër Krimit të Organizuar në SPAK.
Kandidatët e interesuar për postin e Prokurorit të Përgjithshëm kanë afat për të dorëzuar aplikimet deri më 1 gusht, në orën 00:00. Deri në përfundim të këtij afati pritet që garës t’i bashkohen edhe emra të tjerë.
Pas mbylljes së aplikimeve, KLP do të nisë procesin e verifikimit të kushteve ligjore të kandidatëve, i cili duhet të përfundojë deri më 14 gusht. Në vijim, KLP do t’i propozojë Kuvendit tre kandidatë, ndërsa zgjedhja përfundimtare e Prokurorit të Përgjithshëm i takon Parlamentit, për një mandat 7-vjeçar.
Mandati i kreut aktual të Prokurorisë së Përgjithshme, Olsian Çela, përfundon në muajin dhjetor.
