Konferenca e Kryetarëve do të mblidhet ditën e nesërme në Kryesinë e Kuvendit për të diskutuar në lidhje me Projektbuxhetin e vitit 2026. Prezantimi do të bëhet nga Ministri i Financave, Petrit Malaj, ndërsa në këtë mbledhje pritet të ketë edhe debate.
Përveç diskutimeve si do të shpërndahen paratë për vitin e ardhshëm, dy kërkesa të opozitës pritet të “ndezin” përplasje në Konferencën e Kryetarëve.
PD kërkon ngritjen e Komisionit Hetimor për kontrollin e ligjshmërisë në administrimin e fondeve të programit IPARD II (Instrumenti i Asistencës së Para-Anëtarësimit për Zhvillimin Rural).
Gjithashtu, një grup deputetësh opozitarë kanë kërkuar zhvillimin e mocionit me debat “Për gjetjet, konkluzionet dhe rekomandimet e raportit final të OSBE-ODIHR-it për zgjedhjet parlamentare të 11 majit 2025”.
Konferenca e Kryetarëve pritet që të përcaktojë në mbledhjen e ditës së nesërme edhe kohën e debatit për raportin e Komisionit për Çështjet Ligjore dhe Administratën Publike në lidhje me kërkesën për shkarkimin e Presidentit të Republikës së Shqipërisë, Bajram Begaj.
