Princi Andrew, ish-Duka i Yorkut, do të marrë një shumë financiare dhe një pension vjetor për të mbështetur stilin e tij të ri të jetesës si një qytetar i thjeshtë, pas vendimit të Mbretit Charles. Sipas një raporti nga “The Guardian”, qëllimi i kësaj ndihme është të parandalojë shpenzimet e tepërta nga ana e Andrew, i njohur tani si Andrew Mountbatten Windsor.
Andrew do të përfitojë një shumë të caktuar gjashtëshifrore që do të mbulojë zhvendosjen e tij nga rezidenca mbretërore në Windsor në një shtëpi private në Sandringham. Kjo zhvendosje pritet të përfundojë pas Krishtlindjeve. Pas kësaj, ai do të marrë një pension vjetor nga fondet personale të Mbretit Charles, që besohet të jetë disa herë më i lartë se pensioni aktual i Marinës Mbretërore prej 20,000 paundësh në vit.
Bisedimet për paketën e zhvendosjes janë duke u zhvilluar, dhe një deklaratë nga pallati ka konfirmuar se Mbretit Charles ka filluar procesin formal të heqjes së titujve dhe nderimeve të Princit Andrew. Një njoftim formal për dëbimin e tij nga rezidenca mbretërore gjithashtu është dorëzuar.
Kryeministri britanik, Keir Starmer, i ka ofruar mbështetje të plotë vendimit të mbretit. Qeveria ka qenë në konsultim me Pallatin Buckingham para shpalljes së vendimit dhe është shprehur se konsideron se lëvizja e Charles është brenda kornizës kushtetuese. Zyra e Kabinetit ka punuar gjithashtu me këshilltarët e mbretit për të gjetur një zgjidhje që do të shmangte përdorimin e kohës parlamentare dhe ka kërkuar këshilla nga ekspertë në çështjet kushtetuese.
Ky vendim përfaqëson një hap të rëndësishëm në largimin e Princit Andrew nga jeta publike, duke i dhënë fund një periudhe të gjatë të kontestimeve dhe kritikave që e kanë shoqëruar atë në vitet e fundit.
