Gjermania ka zbuluar një plan gjigant për të transformuar ushtrinë e saj (Bundeswehr) në forcën më të fuqishme konvencionale në Evropë.
Plani i investimeve prej 377 miliardë eurosh përfshin fushat tokësore, ajrore, detare, kibernetike dhe hapësinore.
Sipas dokumenteve të brendshme të siguruara nga Politico, plani 39-faqësh parashikon 320 projekte të reja armatimesh dhe pajisjesh që do të nisin me buxhetin ushtarak të vitit 2026.
Kjo nismë vjen pas deklaratës së kancelarit Friedrich Merz, i cili është zotuar t’i japë ushtrisë gjermane “të gjitha burimet financiare që i nevojiten” për t’u bërë “ushtria më e fortë konvencionale në Evropë”.
Berlini ka nisur gjithashtu të heqë kufizimet e “frenës kushtetuese të borxhit” për shpenzimet e mbrojtjes, duke hapur rrugën për investime shumëvjeçare përtej fondit special prej 100 miliardë eurosh të miratuar gjatë qeverisjes së Olaf Scholz.
Industria gjermane del fituese kryesore në këtë plan, me kompaninë Rheinmetall që pritet të përfitojë mbi 88 miliardë euro në kontrata për mjete luftarake, sisteme mbrojtjeje ajrore dhe municione.
Një tjetër aktor kryesor është Diehl Defence, prodhuesi bavarez i raketave IRIS-T, që do të bëhen shtylla kryesore e mbrojtjes ajrore të Bundeswehr-it.
Plani përfshin gjithashtu 14 miliardë euro investime në satelitë dhe programe hapësinore, si dhe zhvillimin e flotës së dronëve dhe sistemeve të komandimit digjital, duke reflektuar një orientim të ri drejt luftës moderne dhe mbrojtjes teknologjike.
Megjithëse fokusi është te industria kombëtare, disa blerje strategjike do të vijnë nga Shtetet e Bashkuara, përfshirë 15 avionë F-35, 400 raketa Tomahawk dhe 4 avionë detarë P-8A Poseidon.
