Presidenti amerikan, Donald Trump u përshkrua si një instrument i providencës hyjnore nga ish-këshilltari i tij, ndërsa hodhi poshtë akuzat se po sillet në mënyrë diktatoriale.
Në një intervistë për The Economist, Steve Bannon tha se ekipi i Trump tashmë ka përgatitur strategjinë. “Në kohën e duhur do ta paraqesim planin. Por ekziston një plan, dhe Trump do të jetë president në vitin 2028”, u shpreh ai.
Kur u pyet për kufizimin kushtetues, Bannon u përgjigj se ka shumë alternativa të ndryshme dhe se në momentin e duhur do të zbulohej rruga ligjore që do të ndiqej. Ai shtoi se Trump do të marrë një mandat të tretë dhe e përshkroi presidentin si të mbrojtur nga Zoti.
“Nuk është i përsosur, as domosdoshmërisht fetar dhe as njeri i kishave, por ai është një mjet i vullnetit hyjnor. Dhe duhet të jetë president edhe për një mandat tjetër”, tha Bannon.
Deklaratat e Bannon vijnë pasi New York Times raportoi për shqetësimet e zyrtarëve të integritetit të zgjedhjeve pas një telefonate me Departamentin e Sigurisë Kombëtare (DHS).
Sipas raportit, disa zyrtarë konservatorë në DHS kanë sugjeruar se Trump mund të shpallë një emergjencë kombëtare për të ndryshuar rregullat e zgjedhjeve në nivel shtetëror, duke justifikuar këtë me hetime mbi manipulimin e zgjedhjeve të vitit 2020.
Në mesin e këtyre zyrtarëve është Heather Honey, e cila ka deklaruar se një shpallje emergjence mund t’i jepte Trump kompetenca shtesë për të vepruar pa miratimin e Kongresit. Megjithatë, ajo pranoi se nuk është e sigurt nëse rrethi i ngushtë i presidentit do ta mbështeste këtë ide.
Ndërkohë, dy aleatë të tjerë të Trump, avokati Kurt Olsen dhe aktivistja Marci McCarthy, janë punësuar kohët e fundit në DHS.
Një zëdhënës e cilësoi raportimin si hipokrizi, duke thënë se agjencia po përqendrohet në mbrojtjen e infrastrukturës kritike dhe kërcënimeve kibernetike, në përputhje me urdhrat ekzekutivë të Trump.
Bannon kishte folur që në mars për një plan ligjor që do t’i lejonte Trump të rrinte në Shtëpinë eBardhë deri në vitin 2032. Në një intervistë për NewsNation, ai refuzoi të zbulonte detaje, por theksoi se po punohet për këtë.
