Prokurorët amerikanë në shtetin e Utah-ës u zotuan të martën se do të kërkojnë dënimin me vdekje për Tyler Robinson, vrasësin e akuzuar të aktivistit konservator Charlie Kirk dhe zbuluan detaje të reja të çështjes së tyre, duke përfshirë mesazhe me tekst në të cilat ai pretendohej se kishte rrëfyer privatisht për të shtënat fatale.
“Më mjaftoi urrejtja e tij”, i tha Tyler Robinson, 22 vjeç, shokut të tij të dhomës dhe partneres romantike kur u pyet pse e kishte kryer vrasjen, sipas transkripteve të mesazheve që i atribuohen të dyshuarit në dokumentet gjyqësore të paraqitura nga prokurorët.
Ai akuzohet se e qëlloi me sniper nga një çati duke e goditur 31-vjeçarin Kirk në qafë. Zyra e Prokurorit të Qarkut të Utah-ës, Jeffrey Gray, e akuzoi Robinsonin për shtatë akuza penale të martën, duke përfshirë vrasje, pengim të drejtësisë për asgjësimin e provave dhe manipulim të dëshmitarëve për shkak se i kërkoi shokut të tij të dhomës të fshinte mesazhet inkriminuese. Disa politikanë, përfshirë Presidentin e SHBA-së Donald Trump, kanë bërë thirrje për dënim me vdekje në këtë rast.
Në një konferencë për shtyp, Gray tha se kishte marrë vendimin për të kërkuar dënimin me vdekje “në mënyrë të pavarur, bazuar vetëm në provat dhe rrethanat e disponueshme dhe natyrën e krimit”. Robinson u paraqit për herë të parë në gjykatë të martën pasdite përmes transmetimit video nga burgu.
Ai dëgjonte me vëmendje ndërsa gjyqtari lexonte akuzat dhe e informonte se mund të përballej me dënimin me vdekje. ADN-ja e gjetur në këmbëzën e armës së dyshuar të vrasjes lidhej me atë të Robinson-it, thanë prokurorët.
Nëna e Robinsonit i tha policisë se gjatë vitit të kaluar djali i saj ishte bërë më i majtë dhe më i “orientuar pro-homoseksualëve dhe të drejtave të transgjinorëve”, thuhej në dokumentin e akuzës. Charlie Kirk, 31 vjeç, bashkëthemelues i lëvizjes studentore konservatore Turning Point USA dhe një aleat kyç i Trump, po fliste në një aktivitet ku morën pjesë 3,000 persona kur u qëllua për vdekje.
