Më 15 shtator 2025, u bë e ditur se Igor Grechushkin, pronari rus i një anije ngarkese të lidhur me furnizimin e nitratit të amonit që shkaktoi shpërthimin masiv në portin e Beirutit më 2020, është arrestuar në Bullgari.
Grechushkin u ndalua në aeroportin “Vasil Levski” të Sofjes, pas një fluturimi nga Qipro, ku kishte dhe shtetësi. Arrestimi erdhi pas dy urdhrave ndërkombëtarë për ndalimin e tij dhe të kapitenit të anijes, Boris Prokoshev, të lëshuar me kërkesë të një gjyqtari hetues libanez.
Autoritetet libaneze po përgatisin dokumentacionin për të kërkuar ekstradimin e Grechushkin në Liban. Në rast të kundërt, hetuesit libanezë mund të udhëtojnë në Bullgari për ta marrë në pyetje.
Shpërthimi i 4 gushtit 2020 shkaktoi vdekjen e të paktën 218 personave, plagosjen e mbi 6,000 të tjerëve dhe shkatërrimin e një pjese të madhe të kryeqytetit libanez, duke sjellë dëme miliardëshe. Hetimi mbi këtë tragjedi ka hasur pengesa të mëdha politike e ligjore, ndërsa asnjë zyrtar libanez nuk është dënuar deri më sot.
Në fillim të këtij viti, presidenti Joseph Aoun dhe kryeministri Nawaf Salam premtuan të vazhdojnë hetimet dhe të mbajnë përgjegjës ata që kanë faj.
