Sipas të dhënave të fundit nga National Survey on Drug Use and Health, gratë e reja të moshës 18–25 vjeç në SHBA raportojnë për herë të parë nivele më të larta të konsumit të tepruar të alkoolit krahasuar me bashkëmoshatarët e tyre meshkuj.
Rreth 32% e grave të reja kanë deklaruar se kanë konsumuar alkool në mënyrë të tepruar gjatë muajit të fundit, krahasuar me 30% të burrave të rinj, sipas studimit të publikuar në revistën shkencore JAMA dhe të raportuar nga ABC News.
Shkencëtarët identifikojnë disa faktorë që ndikojnë në këtë prirje: rritja e stresit dhe ankthit, sidomos pas pandemisë COVID-19, ndryshimi i normave shoqërore që e bëjnë konsumimin e alkoolit më të pranueshëm për gratë, si dhe marketingu i synuar i pijeve alkoolike.
Studimet tregojnë gjithashtu se gratë janë më të prira se burrat të pijnë “për t’u përballur” me problemet e jetës, një zakon që lidhet me një rrezik më të lartë për çrregullime të përdorimit të alkoolit dhe sëmundje të tjera të lidhura me alkoolin.
