Një incident detar është shënuar mesditën e kësaj të diele pranë zonës turistike të Kakomesë, ku dy mjete lundruese tip skaf janë përplasur me njëri-tjetrin. Ngjarja ka ndodhur rreth orës 13:10, në vendin e njohur si “Bukajeto”, ndërsa shkak dyshohet të jenë bërë kushtet e pafavorshme të detit dhe valëzimi.
Si pasojë e përplasjes, tre shtetas të huaj që ndodheshin në njërin prej mjeteve kanë mbetur të plagosur. Të lënduarit janë: Charlotte Ann Richards, 23 vjeç, shtetase australiane, Alit El Haj Sofian, 27 vjeç, shtetas francez, Bionne Catherine, 25 vjeç, shtetase franceze.
Menjëherë pas ngjarjes, është organizuar një operacion i shpëtimit në kohë reale, i koordinuar mes Qendrës Kombëtare të Kërkim-Shpëtimit, Qendrës Ndërinstitucionale Operacionale Detare dhe Policisë Kufitare Sarandë.
Për shkak të terrenit të vështirë dhe mungesës së aksesit për autoambulancë në zonën e Kakomesë, të plagosurit u transportuan fillimisht me mjet detar të Policisë Kufitare drejt Sarandës, e më pas me ambulancë drejt Urgjencës së Spitalit Rajonal Sarandë.
Sipas mjekëve, të tre turistët ndodhen jashtë rrezikut për jetën, megjithatë mbeten nën kujdesin e stafit mjekësor për trajtimin e plagëve të marra nga përplasja.
Autoritetet kanë nisur hetimet për të sqaruar plotësisht rrethanat e aksidentit dhe për të përcaktuar përgjegjësitë. Ndërkohë, vlerësohet reagimi i shpejtë dhe koordinimi mes strukturave të shpëtimit, që ndihmoi në shmangien e pasojave më të rënda për jetën e turistëve.
