Michael Olise është shndërruar në një nga goditjet më të mëdha të Bayern Munich në merkato, ndërsa drejtori sportiv Max Eberl ka zbuluar prapaskenat e transferimit të francezit nga Crystal Palace.
Bayern e bleu Olise në verën e vitit 2024 për 53 milionë euro, ndërsa sot vlera e tij konsiderohet shumë më e lartë.
“Olise kishte një të kaluar të komplikuar. Kaloi nëpër disa akademi në Angli. Por një histori e tillë nuk duhet domosdoshmërisht të jetë problem. Vështirësitë mund ta formojnë një lojtar”, shpjegoi Eberl.
Drejtuesi i Bayern tregoi se një rol të rëndësishëm në vendimin për transferimin e tij pati edhe Oliver Glasner, i cili drejtonte Crystal Palace në atë periudhë.
“Christoph Freund e njeh shumë mirë Glasnerin. Kur një trajner të thotë menjëherë ‘po, merre’, fillon të dyshosh. Por Glasner na tha: ‘Ai ka ende gjëra për të mësuar dhe ne kemi nevojë për të’. Në atë moment kuptuam sa shumë e vlerësonte.”
Eberl shtoi se edhe bisedat personale me Olise e bindën Bayern se po merrte lojtarin e duhur.
“Është kënaqësi të flasësh me Michael për futbollin.”
Megjithatë, edhe drejtuesit bavarezë nuk prisnin një zhvillim kaq të shpejtë të francezit.
“E dinim se po merrnim një anësor shumë të mirë, tipik për Bayern. Por që do të bëhej kaq brilant… kjo na ka surprizuar edhe neve. Zhvillimi i tij lidhet gjithashtu me ambientin dhe skuadrën.”
Olise është tashmë një nga lojtarët më të rëndësishëm të Bayern Munich dhe një transferim që, vetëm dy vite më vonë, duket si një investim i jashtëzakonshëm për klubin bavarez.
