Meri Kacerri, kamarierja që mbeti e plagosur aksidentalisht në atentatin e 8 Shtatorit në Shkodër, ka nevojë për ndihmën e shqiptarëve pasi familja nuk i përballon dot operacionet dhe trajtimet mjekësore. Meri mori plumba në trup, edhe pse nuk ishin nisur për të.
Të afërmit e saj kanë ndërmarrë një nismë në “GoFundME” dhe kërkojnë nga çdokush që ka mundësi, të dhurojë për kurimin dhe shërimin e Meri Kacerrit.
“Ky GoFundMe hapet për Meri Kacerrin, vajzën me quken e saj të bukur dhe buzëqeshjen që i jep dritë çdo ambienti ku hyn. Kush e njeh motrën dhe vajzën tonë, e di se ajo është vajza që nuk dorëzohet kurrë: punon pa u lodhur, edhe kur trupi nuk e mban më, ajo gjithmonë gjen forcë të qëndrojë në këmbë për të ndihmuar familjen.
Fatkeqësisht, më 8 shtator në Shkodër, Meri u plagos rëndë në masakrën e asaj dite, duke qenë thjesht në vendin e saj të punës, pa asnjë faj. Në një çast, jeta e saj ndryshoi krejtësisht dhe tani ajo ndodhet në një betejë për shëndetin e saj.
Situata është shumë delikate dhe kërkon ndërhyrje të menjëhershme mjekësore, operacione dhe trajtime që shoqërohen me shpenzime të konsiderueshme, ndaj, me vështirësi të madhe, por me dorën në zemër, ju drejtohemi juve, miqve, të njohurve dhe çdo zemre të mirë që mund të japë një dorë”, thuhet në njoftim.
Çdo kontribut, sado i vogël, është një hap drejt shpresës, shërimit dhe rikthimit të Merit në jetën e saj të zakonshme, ndaj të afërmit shprehin mirënjohjen për çdo mbështetje, qoftë ajo financiare, shpirtërore apo edhe thjesht duke ndarë këtë fushatë me të tjerët.
Mëngjesin e 8 Shtatorit qyteti i Shkodrës u trondit nga breshëria e plumbave, ku u tentua të vritej Erogen Vaso alias Brajoviç, por që fatkeqësisht humbën jetën miku i tij Armando Pali dhe shoferi Liridon Kraja. Vetë Vaso mbeti i plagosur, bashkë me kamarieren Meri Kacerri.
Autori u identifikua dhe u arrestua shpejt. Ai ishte 29 vjeçari Ragip Gila, i cili në dëshminë paraprake ka thënë se vrasjen e Erogen Vasos e kishte marrë përsipër pasi ky i fundit e kishte kërcënuar.
