Frank Caprio, një gjyqtari i njohur amerikan që fitoi zemrat e miliona njerëzve në mbarë botën me dhembshurinë dhe njerëzillëkun e tij në sallën e gjyqit, ka ndërruar jetë në moshën 88-vjeçare. Lajmi për ndarjen e tij nga jeta u konfirmua të mërkurën nga djali i tij, Frank T. Caprio.
I zgjedhur si gjyqtar në vitin 1985, Caprio u bë një figurë e dashur jo vetëm në komunitetin e tij në Providence, por edhe globalisht përmes emisionit të njohur televiziv ‘Caught in Providence’. Shfaqja, e cila u nominua për çmimin prestigjioz ‘Daytime Emmy’ në vitin 2021, fitoi një audiencë të gjerë falë mënyrës unike të Caprio-s për të trajtuar rastet, shpesh me një kombinim të drejtësisë dhe mëshirës.
Klipet e gjyqtarit Caprio duke dëgjuar me kujdes historitë personale të qytetarëve dhe duke treguar dhembshuri në vendimet e tij u bënë virale në rrjetet sociale, duke i dhënë atij statusin e një sensacioni ndërkombëtar në internet. Ai njihej për mënyrën e tij të ngrohtë dhe humane, duke treguar se drejtësia mund të zbatohet me zemër.
Trashëgimia e tij do të jetojë përmes mijëra rasteve që ai trajtoi me dinjitet dhe respekt, si dhe përmes mesazhit të tij të fortë: se çdo njeri meriton të dëgjohet dhe trajtohet me dinjitet.
Ai do të kujtohet jo vetëm si gjyqtar, por si një njeri që frymëzoi botën me thjeshtësinë dhe njerëzinë e tij.
