Në epokën e internetit, reagimet e lojtarëve në rrjetet sociale shpesh tregojnë edhe gjendjen e tyre emocionale apo rebelimin ndaj një akti të caktuar. Reagimi i Ademola Lookman sot, duket qartësisht si një shpërthim nervash i sulmuesit nigerian.
Ky i fundit dëshiron të shkojë te Interi që e ka piketuar si përforcim, por Atalanta refuzoi edhe ofertën e fundit prej 42 milionë eurosh me 3 milionë të tjera si bonuse, që i bënë milanezët. Një vendim që nuk i pëlqeu Lukman, i cili ka marrë një vendim “drastik”.
Futbollisti i cili raportohet se kishte gjetur akordin me Interin për në rrogë prej 4,5 milionë eurosh neto në sezon deri në vitin 2030, në shenjë proteste ka hequr nga faqja e tij në Instagram të gjitha fotot me fanellën e Atalantës.
Përveç të tjerave, ai ka hequr nga bio edhe shkrimin “lojtar i Atalantës”, si dhe nuk ndjek më llogarinë në Instagram të klubit i cili zotëron kartonin e tij.
Një mesazh i qartë ndaj klubit, që gjithsesi është mësuar me sjellje të tilla. Edhe një vit më parë lojtari kërkonte me çdo kusht të shkonte te PSG që e kërkonte, por në fund nuk ia doli e vazhdoi të luante me Atalantën.
