Zbardhet dinamika e ngjarjes së rëndë të ndodhur dy ditë më parë në Frashër të Fierit ku Ermalinda Rama 26 vjeç, mbyt babain e saj me tel, Anesti Rama, në bashkëpunim me të ëmën, Valbona Rama dhe partnerin e saj, Çlirim Dogani, të tre tashmë të arrestuar nga policia.
Burime për media kanë bërë me dije se fillimisht dyshohet se Ermalinda Rama ka goditur të atin në organet gjenitale dhe ky i fundit është rrëzuar dhe ka rënë në tokë. Më pas Çlirim Dogani i ka mbajtur duart për të mos lëvizur Anesti Ramës teksa 26-vjeçarja e mbyste me tel.
Për vrasjen e 56-vjeçarit autorët kanë përdorur sende të forta e mjete prerëse, referuar këtu dhe autopsisë së kryer, ku u deklarua se Anesti Rama ishte masakruar në pjesët intime.
Bashkëshortja e viktimës, Valbona Rama është e akuzuar si bashkëpunëtore në krim pasi ka larë trupin e viktimës me qëllim heqjen e njollave të gjakut. Fillimisht ata kanë dashur që ta trajtojnë ngjarjen si aksidentale, por më pas 26-vjeçarja ka pranuar krimin në polici.
Rrethanat që e kanë shtyrë 26-vjeçaren të kryejë krimin makabër ndaj të atit të saj janë ende vetëm dyshime, të cilat po hetohen. Fillimisht në polici,Ermalinda dëshmoi se babai nuk e lejonte që të jetonte e lirë, të vishej, të dilte me shoqet e madje as nuk i jepte para, deklarata këto të mbetura ende në kuadrin e pretendimeve.
Por, me arrestimin e Çlirim Doganit, doli në paj marrëdhënia e Ermalindës me 55-vjeçarin, i cili rezulton i martuar dhe baba i një fëmije në moshë madhore. Sipas informacioneve për media, Anesti Rama nuk ka qenë dakord për këtë lidhje të vajzës dhe kjo e fundit e ka vrarë pasi ai ishte pengesë. Ermalinda Rama më parë ka qenë dhe 3 herë të tjera e fejuar.
