Zgjoheni në orën 4 të mëngjesit, ndërkohë që alarmi është vendosur për në 8. E ndieni që duhet të flini përsëri, por sytë nuk ju mbyllen. Shikoni nga dritarja me shpresën për ndonjë rreze drite, por nata është ende në mes të saj.
Mos u shqetësoni, ja disa këshilla të thjeshta dhe praktike që mund t’ju ndihmojnë të rifitoni gjumin:
1. Qëndroni të qetë dhe mos shikoni orën
Shikimi i orës vetëm sa shton ankthin dhe presionin për të fjetur. Qëndroni shtrirë dhe përqendrohuni te frymëmarrja. Mundohuni të qëndroni sa më të relaksuar.
2. Provoni meditimin
Nëse pas disa minutash ende nuk po flini, aplikoni teknika relaksimi si frymëmarrja e thellë apo meditimi. Shumë aplikacione për telefon ju udhëzojnë hap pas hapi për të medituar dhe për t’u qetësuar.
3. Përdorni ujë të ftohtë
Sipas “Huffington Post”, nëse po luftoni me pagjumësinë, një mënyrë e pazakontë por efektive është të fusni kokën për 30 sekonda në ujë të ftohtë. Më pas, shtrihuni përsëri dhe përpiquni të flini.
4. Bëni ushtrimin 4-7-8
Ky ushtrim i njohur nga Dr. Andrew Weil ndihmon në qetësimin e sistemit nervor dhe rritjen e qarkullimit të oksigjenit:
- Vendosni majën e gjuhës pas dhëmbëve të sipërm dhe mbajeni aty gjatë gjithë ushtrimit.
- Merrni frymë me hundë për 4 sekonda.
- Mbajeni frymën për 7 sekonda.
- Nxirrni frymën ngadalë për 8 sekonda.
- Përsëriteni këtë cikël tre herë.
