Një tjetër rast mashtrimi me viza është bërë publik nga qytetari Luan Ndou, i cili ka denoncuar agjencinë “Viza Travel Agency” në emisionin investigativ Fiks Fare. Ai akuzon këtë agjenci se i ka marrë para me premtimin për një vizë pune në Kanada, por nuk ka marrë asnjë shërbim dhe nuk i janë kthyer paratë.
Sipas deklaratës së tij, Ndou ka paguar 1,000 euro me garancinë se brenda 6 muajve do të merrte vizën. Megjithatë, afati kaloi pa asnjë procedurë të përfunduar dhe pa ndonjë njoftim zyrtar nga agjencia.
Në përpjekje për të kontaktuar me drejtuesin e saj, z. Hamza Bytyçi, qytetari mori vetëm justifikime dhe premtime boshe, pa asnjë zgjidhje konkrete. Më vonë, ai zbuloi se profili i agjencisë në Instagram ishte fshirë, zyra ishte boshatisur dhe personi përgjegjës nuk gjendej më.
Ndou thekson se nuk është i vetmi që është mashtruar. Sipas tij, edhe qytetarë të tjerë kanë paguar deri në 1,500 euro për të njëjtin shërbim, por kanë mbetur në të njëjtën situatë.
Një punonjëse e ndërtesës ku ndodhej më parë agjencia ka konfirmuar se prej ditësh askush nuk është paraqitur atje dhe shumë qytetarë – përfshirë edhe një nënë me fëmijë – kanë ardhur në kërkim të personit përgjegjës. Ajo shton se kjo nuk është hera e parë që ndodhin raste të tilla me këtë agjenci dhe se situata është kthyer në një shqetësim serioz për komunitetin.
Gazetarët e Fiks Fare shkuan në ambientet e dikurshme të agjencisë dhe gjetën vetëm disa sende të braktisura, si një stilolaps me logon “punësohu.eu”, një xhaketë mbi tavolinë dhe një poster të palosur me emrin “Viza Travel Agency”.
Pavarësisht përpjekjeve, pronari i agjencisë vijon të mos reagojë dhe nuk ka ofruar asnjë kontakt me qytetarët e dëmtuar.
