José Mourinho ka dalë në mbrojtje të skuadrës dhe yjeve të Real Madridit në prag të ndeshjes me Rayo Vallecanon, duke dërguar një mesazh të qartë si për kritikët, ashtu edhe për Vinicius dhe Mbappé.
Duke iu rikthyer fitores ndaj Interit në Champions League, portugezi pranoi se skuadra vuajti, por theksoi se Real Madridi kishte edhe shumë mundësi për ta mbyllur ndeshjen me rezultat më të thellë. “Mund të na kishin shënuar katër, po, por ne mund të kishim shënuar tetë. Ka njerëz që e kuptojnë futbollin dhe këtë nuk e thonë. Pse? Nuk janë të kënaqur që fituam?”, deklaroi Mourinho.
Trajneri mbrojti gjithashtu Viniciusin pas kritikave dhe fishkëllimave të fundit në “Bernabéu”. “Në Portugali kemi një shprehje: vetëm pemëve që japin fruta u hidhen gurë. Vinicius është një pemë me shumë fruta. Versioni i tij më i mirë ende nuk ka ardhur”, tha ai.
Të njëjtën shprehje Mourinho e përdori edhe për Mbappén. “Një lojtar që shënon 40 gola nuk mund të jetë kurrë problem për skuadrën. Ai është një pemë me shumë, shumë fruta.” Portugezi vlerësoi veçanërisht sakrificën e francezit në fazën mbrojtëse në minutat e fundit ndaj Interit.
Mourinho konfirmoi se ndaj Rayo Vallecanos mund të ketë disa ndryshime për t’i dhënë skuadrës më shumë energji, pasi Camavinga, Bernardo Silva dhe Arda Güler janë rikthyer. Megjithatë, ai ishte i prerë për objektivin: “Nuk po mendoj për tri ndeshjet e ardhshme. Po mendoj për nesër. Dua të fitoj.”
