Një 45-vjeçare ka përfunduar në prangat e policisë Tiranë, pasi dyshohet se u merrte para familjeve të prekura nga tërmeti i 2019-ës, duke u premtuar dëmshpërblime dhe banesa të reja.
Sipas Policisë, Ina Cakaj dyshohet se shfrytëzonte situatën e familjeve të dëmtuara nga tërmeti për t’u marrë shuma të konsiderueshme parash. Ajo prezantohej si punonjëse e administratës dhe premtonte se mund të ndikonte në procedurat për përfitimin e dëmshpërblimeve apo banesave.
Shumat që u kërkoheshin qytetarëve varionin nga 1,000 deri në 10,000 euro, ndërsa deri në këtë fazë dyshohet se janë mashtruar rreth 30 persona në zonën e Fushë-Krujës.
Sipas të dhënave të hetimit, dëmi i shkaktuar arrin në rreth 60 milionë lekë të vjetra.
Në cilësinë e provës materiale janë sekuestruar dokumente dhe certifikata familjare që u përkasin personave të përfshirë në skemë.
45-vjeçarja po hetohet për veprat penale “Mashtrimi”, “Falsifikimi i dokumenteve” dhe “Përvetësimi i titullit apo detyrës shtetërore”. Ndërkohë, autoritetet po vijojnë verifikimet për raste të tjera të mundshme.
