Një 41-vjeçar është arrestuar në Lezhë pasi dyshohet se qarkullonte i armatosur me një automjet të blinduar dhe tentoi t’i shmangej kontrollit të Policisë.
Sipas Policisë, A. M. u pikas në Torovicë duke lëvizur me një automjet të blinduar. Pasi efektivët i dhanë shenjë për të ndaluar, ai nuk iu bind urdhrit dhe u largua me shpejtësi.
Ndjekja vijoi për disa minuta, deri në fshatin Malecaj, ku 41-vjeçari u kap dhe u arrestua.
Gjatë ndjekjes, ai dyshohet se ka hedhur nga automjeti një pistoletë, e cila kishte fishek në fole, si dhe karikatorin me disa fishekë. Në përfundim të operacionit u sekuestruan arma, municionet dhe automjeti i blinduar.
I arrestuari rezulton me precedent penal për “Kanosjen” dhe “Kundërshtimin e punonjësve të Policisë”.
