Detaje të reja janë zbardhur prej rezultateve të autopsisë për vrasjen e 25 vjeçarit Kevin Muarremi, i cili kujtojmë se u ekzekutua natën e 14 Shkurtit në Montecalvoli, në komunën Santa Maria a Monte të Italisë.
Sipas raportit mjekoligjir, ka qenë vetëm njëri nga plumbat e qëlluar me një pistoletë gjysmëautomatike Beretta kalibër 6.35, ai i cili rezultori fatal. Plumbi ashtu si edhe është raportuar më parë e goditi të riun në anën e djathtë të qafës duke i shkaktuar dëmtime shumë të rënda në shtyllën kurrizore në nivelin e vertebrave C2 dhe C3. Si pasojë u ndërprenë rrugët nervore, çka solli paralizë të frymëmarrjes dhe hemorragji të brendshme që çuan në vdekjen e menjëhershme të tij. Raporti mjeko-ligjir i depozituar së fundi përmban edhe rezultatet e autopsisë së kryer më 13 mars.
Kujtojmë se për vrasjen e të riut akuzohet 20-vjeçari shqiptar Renato Xyke, banues në Santa Maria a Monte, i cili ndodhet në burg që prej ditës së krimit. Ai ra në pranga në Arezzo, teksa po largohej me familjen me një automjet tip Range Rover voque, i njëjti mjet nga i cili dyshohet se u qëllua drejt Muharremit. Hetimet kanë dëshmuar se, Xyke nuk ka mohuar se ka qëlluar në drejtim të viktimës, i cili ndodhej në sediljen e pasagjerit të një Fiat Doblò të bardhë, ku më pas u gjet pa shenja jete.
Sipas hetuesve vrasja ka ardhur si rezulatat i një konflikti mes dy grupesh shqiptarësh, i cili kishte nisur pak orë më herët dhe mund të kishte rrënjë edhe më të hershme. Përplasaja e parë ndodhi brenda një lokali në zonën Capanne di Montopoli, ndërsa më pas konflikti vazhdoi në parkingun e lokalit. Pas kësaj, palët dyshohet se komunikuan edhe në telefon, derisa u takuan në një takim që rezultoi fatal në Viale della Repubblica, ku ndodhi ekzekutimi.
Ekspertiza dëshmon se Muharremi u godit edhe nga një plumb tjetër që i preku lehtë parakrahun, në vendin e ngjarjes janë qëlluar të paktën 6 plumba. Renato Xyke nuk është i vetmi person nën hetim. Në automjet me të ndodhej edhe një 18-vjeçar shqiptar me banim në Montecalvoli, i cili aktualisht hetohet në gjendje të lirë. Ai është paraqitur vullnetarisht në Prokurori, së bashku me avokatin e tij, për të dhënë versionin e ngjarjes.
