Protesta qytetare kundër qeverisë hyn sot në ditën e saj të 54-t, ndërsa qytetarët janë mbledhur në orën 08:30 para godinës së Kuvendit të Shqipërisë, në të njëjtën ditë kur zhvillohet seanca e fundit plenare e këtij sesioni parlamentar.
Kërkesa kryesore dhe e panegociueshme e protestuesve mbetet dorëheqja e kryeministrit Edi Rama.
Aktivistët deklarojnë se synimi i tyre është t’u përcjellin deputetëve mesazhin se qytetarët nuk ndihen të përfaqësuar nga Parlamenti aktual, duke kërkuar reagim ndaj shqetësimeve të tyre.
Me pankarta dhe thirrje si “Nuk na përfaqësoni!”, “Parlamenti i krimit” dhe “Rama, jep dorëheqjen”, protestuesit kanë paralajmëruar se do të vijojnë mobilizimin edhe në ditët në vijim.
Ndërkohë, Kuvendi mblidhet në orën 10:00 për një seancë të ngarkuar, ku do të raportojnë shtatë institucione kushtetuese: Këshilli i Lartë Gjyqësor (KLGJ), Këshilli i Lartë i Prokurorisë (KLP), Kontrolli i Lartë i Shtetit (KLSH), Prokuroria e Përgjithshme, SPAK, Avokati i Popullit dhe Inspektori i Lartë i Drejtësisë (ILD). Raportimet ishin shtyrë nga seanca e kaluar për shkak të tensioneve të shkaktuara nga deputetët e Partisë Demokratike.
Në rendin e ditës janë parashikuar gjithashtu interpelanca dhe seanca pyetje-përgjigje me ministrin e Infrastrukturës dhe Energjisë, Enea Karakaçi. Deputeti Blendi Himçi ka kërkuar interpelancë për vonesat në ndërtimin e bypass-it të Elbasanit, ndërsa deputetët Bujar Leskaj dhe Erald Kapri do të zhvillojnë seanca pyetje-përgjigje për memorandumin Shqipëri-Greqi për gazin natyror të lëngshëm dhe për çështjen e pronave në fshatin Zgjup Kodër të Gramshit.
Seanca do të shqyrtojë gjithashtu një sërë aktesh normative dhe projektligjesh, mes tyre edhe ndryshimet në ligjin “Për turizmin”, të cilat sipas shumicës synojnë të ndalojnë gardhet që bllokojnë hyrjen në plazhe dhe ndërtimet gjatë sezonit turistik.
Ndërkohë, raporti për Reformën Territoriale, prezantimi i të cilit u kërkua në seancën e kaluar nga Partia Socialiste, nuk është përfshirë në rendin e ditës. Megjithatë, Konferenca e Kryetarëve, e cila mblidhet një orë para nisjes së seancës, pritet të vendosë nëse do të ketë ndryshime në axhendën parlamentare ose shtyrje të sesionit.
