Sekretari amerikan i Shtetit, Marco Rubio, deklaroi se Shtetet e Bashkuara nuk kanë nevojë të rifillojnë operacionet e mëdha ushtarake kundër Iranit, pasi presioni ekonomik dhe bllokada detare po japin rezultate. Duke folur në Paris, pas takimeve dyditore me aleatët e G7-s, Rubio tha se sanksionet dhe kufizimet ndaj eksporteve iraniane të energjisë po shkaktojnë dëme gjithnjë e më të mëdha në ekonominë e Teheranit.
“Dhimbja ekonomike që po i shkaktohet Iranit tani është e jashtëzakonshme dhe po shtohet çdo ditë”, u shpreh ai. Rubio kundërshtoi gjithashtu idenë se shmangia e sulmeve të reja ushtarake do të nënkuptonte një ngërç apo kthim në status quo-në e mëparshme.
Deklaratat vijnë pasi presidenti Donald Trump tha se për momentin do të pezullojë sulmet e reja ndaj Iranit, pas kërkesave nga disa vende të rajonit. Rubio theksoi se nëse objektivat amerikane mund të arrihen përmes presionit ekonomik, atëherë nuk ka arsye për të përdorur forcën ushtarake në shkallë të gjerë.
