Victor Boniface do jetë ylli i radhës që lë Europën për të nisur një aventurë në Arabinë Saudite, aty ku do jetë partner në sulm me Cristiano Ronaldon tek Al Nassr.
Fabrizio Romano raporton se klubi saudit dhe Leverkusen kanë rënë dakord për transferimin e Boniface për 50 milionë euro. Trajneri i “Aspirinave”, Xabi Alonso, ka konfirmuar mungesën e sulmuesit për sfidën e nesërme në Champions ndaj Sparta Prague dhe ka konfirmuar që transferimi i tij drejt Arabisë Saudite është në prag të zyrtarizimit.
Nigeriani u transferua te Leverkusen në verën e vitit 2023 nga belgët e Union Saint-Gilloise për 22 milionë euro. 24-vjeçari ka shënuar 15 gola këtë sezon për Leverkusen në të gjitha kompeticionet. Boniface do të zëvendësojë Anderson Talisca, i cili la Al Nassr dhe u zyrtarizua dje te Fenerbahce.
