Situata në Shqipëri është problematike për shkak të motit të keq. Operatori i Sistemit të Shpërndarjes ka bërë me dije se zona më problematike përsa i përket furnizimit me energji elektrike është Shkodra dhe kryesisht zonat rurale e të thella malore. Në rajonin e Kukësit bëhet me dije se nuk ka pasur probleme të rënda me linjat dhe furnizimin me energji. Kurse në orët e drekës si pasojë e motit të keq ka pasur problematika në rajonet e Elbasanit dhe Beratit.
“Si pasojë e kësaj situate ka pasur probleme me furnizimin me energji në fiderat 10/6 kV që furnizojnë me energji kryesisht zona rurale të thella malore. Gjatë paradites Nënstacioni Radhimë është stakuar për arsye sigurie, pasi kishte nivel të lartë të ujit nga reshjet e shumta. Aktualisht ky nënstacion është rivënë në punë dhe situata është normalizuar. Në të gjithë vendin aktualisht kemi 43 fidera me probleme. OSSH ka të angazhuar në terren aktualisht 1500 punonjës me 196 mjete motorike lëvizëse, të cilët po i përgjigjen në kohë çdo avarie apo problem që konstatohet. Në vëmendje janë edhe hidrovoret në të gjithë vendin, për të shmangur problematikat me përmbytjet,”- thuhet ndër të tjera në njoftim.
Sot i gjithë vendi është përfshirë në reshje të dendura dëbore. Në Dibër, Peshkopi dhe Bulqizë trashësia e dëborës ka arritur rreth 20 cm, ndërsa në zonat e thella varion deri në 40 cm. Probleme janë hasur edhe rrugët nacionale mesditën sotme, ku reshjet me stuhi të fortë po bllokojnë shpeshherë aksin rrugor Bulqizë-Fushë Bulqizë në drejtim të Peshkopisë. Probleme ka pasur edhe në Korçë e Kukës.
