Nëse për t’u ngjitur në shtëpi duhet të zgjidhni mes ashensorit dhe shkallëve, zgjedhja mund të ndikojë edhe në shëndetin tuaj. Një studim i realizuar nga studiues në Angli sugjeron se ngjitja e shkallëve në mënyrë të rregullt lidhet me një rrezik më të ulët të sëmundjeve kardiovaskulare dhe të vdekjes.
Studiuesit kanë analizuar të dhënat e rreth 480 mijë personave, të shëndetshëm dhe me probleme kardiake, të moshës 35 deri në 80 vjeç. Sipas rezultateve, personat që ngjiteshin rregullisht me shkallë kishin 39% më pak rrezik për të vdekur nga sëmundjet e zemrës dhe 24% më pak rrezik për të vdekur nga çdo shkak, krahasuar me ata që i përdornin shkallët më rrallë.
Aktiviteti fizik, edhe kur përfshihet në rutinën e përditshme, rekomandohet nga mjekët si një nga mënyrat për të mbrojtur shëndetin e zemrës. Ngjitja e shkallëve lidhet gjithashtu me uljen e kolesterolit dhe me një rrezik më të ulët për infarkt dhe goditje në tru.
Sëmundjet kardiovaskulare mbeten një ndër shqetësimet kryesore të shëndetit publik në Shqipëri. Sipas të dhënave të referuara për vitin 2025, rreth 53% e vdekjeve në vend lidhen me sëmundje të enëve të gjakut dhe probleme të tjera kardiovaskulare.
Ndër faktorët kryesorë të rrezikut janë presioni i lartë i gjakut, kolesteroli dhe mbipesha. Të dhënat tregojnë se rreth 41% e personave të moshës 30 deri në 79 vjeç vuajnë nga tensioni i lartë.
Mesazhi i specialistëve është i thjeshtë: aktiviteti fizik nuk kërkon domosdoshmërisht orë të gjata në palestër. Edhe zgjedhje të vogla të përditshme, si përdorimi i shkallëve në vend të ashensorit, mund të kontribuojnë në një jetë më aktive dhe në shëndetin e zemrës.
