Policia Rrugore ka arritur që të shpëtojë një familje prej 5 anëtarësh të cilët kishin mbetur të bllokuar në rrugën që të çon për në Malin e Tomorit.
Sipas njoftimit të autoriteteve mësohet se gjatë patrullimit në aksin rrugor Poliçan-Mali i Tomorit, shërbimet e Qarkullimit Rrugor konstatuan një automjet të ndaluar me pesë shtetas brenda, përfshirë dy fëmijë.
Familja nga Berati kishte udhëtuar drejt Malit të Tomorit, mirëpo gjatë kthimi automjeti i tyre kishte hasur vështirësi për shkak të dëborës të dendur. Mësohet se automjeti kishte xhiruar dhe kishte pësuar dëmtime në goma, duke e bërë kështu të pamundur vijimësinë e lëvizjes.
Kanë qenë efektivët ata të cilët kanë shpëtuar familjen si dhe i kanë transportuar ata me automjetin e tyre deri në banesë, duke iu siguruar kështu një rikthim të sigurt.
Sakaq, blutë kanë bërë apel që të gjithë drejtuesit e mjeteve të cilët kanë plan të udhëtojnë drejt Malit të Tomorit, të pajisen me zinxhira si dhe goma dimërore.
Gjithashtu, për të shmangur aksidentet ata iu bëjnë apel që të respektojnë të gjitha udhëzimet e Policisë Rrugore dhe të shmangin parakalimet e gabuara.
Ndërkohë, borëpastrueset vazhdojnë punën në këtë aks rrugor për të pastruar rrugët dhe siguruar kalueshmërinë.
