Arsenal ka nisur bisedimet për t’i rinovuar kontratën Declan Rice, me qëllim që të sigurojë për një kohë të gjatë të ardhmen e një prej lojtarëve më të rëndësishëm të skuadrës.
Sipas BBC Sport, diskutimet mes palëve kanë filluar tashmë, edhe pse ndodhen ende në fazat e hershme. Nuk ka ende një afat të përcaktuar për mbylljen e marrëveshjes, por procesi për ta mbajtur mesfushorin anglez në Londrën Veriore ka nisur zyrtarisht.
Kontrata e re pritet të përfshijë edhe një rritje page për Rice, duke e vendosur atë mes lojtarëve më të paguar të skuadrës së Arsenalit.
Declan Rice iu bashkua Arsenalit nga West Ham në vitin 2023 për shumën e 105 milionë paundëve dhe që prej atëherë është kthyer në një nga liderët kryesorë të ekipit. Mesfushori 27-vjeçar ka ende edhe dy sezone kontratë me klubin londinez, ndërsa ekziston edhe opsioni për një vit shtesë.
