Dy banorë të zonës së Rrjoll kanë mbetur të lënduar pas përplasjeve me forcat e policisë, gjatë kundërshtimit të tyre ndaj ndërtimit të një resorti në tokat që pretendojnë si pronë të trashëguar.
Të dëmtuarit janë transportuar për ndihmë mjekësore në Spitali Rajonal i Shkodrës, ndërsa situata në zonë mbetet e tensionuar mes banorëve, autoriteteve dhe përfaqësuesve të kompanisë ndërtuese.
“Si çdo ditë po shkojmë te toka e të parëve tonë. Ka qenë policia gardh. Djalin dje e kanë goditur me grushte. Nuk kthehemi pas në asnjë send. Na ka qëlluar me gurë na kanë vendosur për fund në mënyrë makabre. Do të vazhdojmë pa ndalim derisa të dali e drejta. Nuk kemi kundërshtim me shtetin, dua të bllokohen punimet. Jam dëmtuar në këmbë dhe qafë. Më kanë tërhequr zvarrë”, tha një banor.
“Shkojmë tek tokat tona , s’na lënë. Na marrim si të jemi në Kabul. Policia është 100% me palën tjetër. Të na dalë zot shteti se asgjë nuk na ka ngel më keq do të bëhet. Sa dolëm policia duke na sharë e ofenduar. Më kapi dikush më gjuajti e më hodhi në gurë. Jam vrarë në shpinë e kraharor”, tha banori tjetër i dëmtuar.
