Pedri po kalonte një mbrëmje të vështirë në Pragë. Temperaturat nën zero dhe markimi i ngushtë i Moses po i prishnin lojën, duke e detyruar të humbte topa dhe duele pa qenë shumë i sigurt në veprime. Por situata u përkeqësua edhe më shumë në minutën e 58-të.
Mesfushori u rrëzua në fushë duke kapur pjesën e pasme të kofshës së djathtë (hamstring). Shokët e ekipit iu afruan menjëherë, ndërsa mjeku Ricard Pruna kërkoi zëvendësim, i bindur se bëhej fjalë për një dëmtim serioz.
Ekzaminimet që do të kryhen në Barcelonë do të përcaktojnë shkallën e dëmtimit, por përshtypjet e para nuk janë të mira dhe flitet edhe për mundësinë e një çarje muskulore. Nëse konfirmohet, koha e rikuperimit – duke pasur parasysh historikun e Pedrit me këto dëmtime – mund të shkojë rreth tre deri në katër javë.
Kjo është një goditje tjetër për Hansi Flick, i cili humbet një lojtar kyç për ndeshjet e ardhshme. Pedri i bashkohet listës së mungesave ku tashmë janë edhe Gavi dhe Christensen.
