Reshjet e dëborës janë rikthyer sërish në juglindje të vendit dhe në Qarkun Dibër si pasojë e temperaturave të ulëta. Në fshatin turistik të Dardhës, trashësia e dëborës ka arritur deri në 40 centimetra, ndërsa dëborë është regjistruar edhe në Vithkuq, Voskopojë, Boboshticë, qytetin e Korçës, Kolonjë dhe Devoll.
Akset nacionale në juglindje janë të kalueshme pa probleme, ndërsa drejtuesit e mjeteve që lëvizin drejt zonave turistike dhe fshatrave malorë këshillohen të përdorin goma dimërore.
Ndërkohë, reshjet e borës kanë përfshirë edhe një pjesë të Qarkut Dibër. Që prej orëve të para të mëngjesit, bora ka rënë në Bulqizë dhe Dibër, duke krijuar vështirësi në qarkullimin e automjeteve. Situata paraqitet më problematike në rrugën e Arbrit, nga tuneli i Qafës së Buallit deri në Fushë Bulqizë, ku ka prani të dëborës në asfalt.
Autoritetet u bëjnë thirrje drejtuesve të mjeteve të tregojnë kujdes të shtuar dhe të jenë të pajisur me goma dimërore dhe zinxhirë. Reshjet kanë shkaktuar vështirësi edhe në zonat malore të Dibrës, ku në disa fshatra trashësia e dëborës ka arritur deri në 15 centimetra.
Shtabet e mbrojtjes civile në Bashkinë Bulqizë kanë kërkuar ndërhyrje në rrugët rurale, ndërsa firmat kontraktore janë angazhuar për pastrimin e akseve nacionale. Ndërkohë, në tunelet e rrugës së Arbrit, në zonën e fshatit Klos, është raportuar shkëputje e energjisë elektrike, një problem i përsëritur ditët e fundit.
