Rrugët e vendit kanë qenë më të qeta këtë fund vit. Gjatë muajit nëntor në vend ka pasur si më pak aksidente rrugore, ashtu dhe më pak të aksidentuar, ndryshe nga muajt e mëparshëm, kur tendenca ishte në rritje të fortë. INSTAT bëri të ditur se në muajin Nëntor 2024 numërohen 147 aksidente rrugore, nga 167 aksidente që u shënuan në të njëjtin muaj të një viti më parë.Në këto aksidente kishte 188 të aksidentuar (të vrarë dhe të plagosur) nga 212 në nëtor të një viti më parë. INSTAT raporton se të dhënat e publikuara janë paraprake dhe subjekt përditësimi. Gjithsesi, për 11 mujorin, si aksidentet ashtu të aksidentuara kanë qenë në rritje. Për janar-nëntor numërohen gjithsej 1517 aksidente, me rritje prej 34% në krahasim me 11 mujorin e një viti më parë, kur ndodhën gjithsej 1128 aksidente.
Edhe të aksidentuarit janë me rritje prej 36%, duke u kaluar 2 mijë personat. Sipas INSTAT, gjatë periudhës Janar- Nëntor 2024, vdekshmëria në aksidente rrugore është 9,8 për 100 aksidente, nga 15,7 që ishte në të njëjtën periudhë të një viti më parë.Aksidentet rrugore, në 90,5% të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve, në këtë periudhë, është kryer nga grup-mosha 25-34 vjeç, duke zënë 26,5% të numrit të aksidenteve gjithsej.Në muajin Nëntor 2024, numri më i lartë i aksidenteve rrugore ka ndodhur përgjatë ditës së Mërkurë me 18,4%, ndërsa numri më i ulët i aksidenteve ka ndodhur përgjatë ditës së Hënë, me 10,2%. Numri më i lartë i aksidenteve rrugore ka ndodhur përgjatë harkut kohor 17:00-19:00, duke zënë 25,2% të numrit të aksidenteve rrugore gjithsej./ Monitor
