“Santiago Bernabéu” përjetoi një nga ato pasdite kur gjithçka ndihet e ndezur që përpara se të nisë ndeshja. Pas humbjes dhe eliminimit ndaj Albacete, tifozët e Real Madridit vendosën të mos e “gëlltisin” më situatën dhe e kthyen zemërimin ndaj ekipit. Shënjestrat kryesore ishin Jude Bellingham dhe Vinicius Junior, të cilët u fishkëllyen pothuajse sa herë preknin topin. Në tribuna u dëgjuan edhe thirrje “Florentino, dorëheqje!”
Paralajmërimi erdhi që me mbërritjen e autobusit të ekipit pranë hyrjes së stadiumit, në Plaza de los Sagrados Corazones, ku zakonisht mblidhen tifozët para ndeshjeve të mëdha. Edhe gjatë nxehmjes, fishkëllimat nisën herët: sapo Courtois dhe dy portierët e rinj Fran González e Sergio Mestre dolën në fushë, u pritën me reagime negative. E njëjta gjë ndodhi pak më pas kur lojtarët dolën për ushtrimet para ndeshjes, ndërsa volumi i protestës u rrit teksa tribuna u mbush.
Momenti kulmor i pjesës së parë erdhi kur spikeri i stadiumit nisi të lexonte formacionin. Reagimet u bënë më të forta, me Bellingham dhe sidomos Vinicius që morën fishkëllimat më të zhurmshme, ndërsa edhe Valverde u prit me mjaft pakënaqësi. Kur u dëgjua himni, zhurma u rrit sërish dhe disa tifozë përdorën edhe bilbila, duke e bërë protestën edhe më të dukshme. Në fund të pjesës së parë, pas një 45-minutëshi jo të mirë të Realit, Bernabéu e përsëriti mesazhin me një tjetër valë fishkëllimash.
Megjithatë, jo të gjithë u trajtuan njësoj. Disa ndërhyrje dhe vrapime në mbrojtje u vlerësuan, sidomos nga Asensio, që ndali një aksion të rrezikshëm, dhe Gonzalo, i cili u hodh në sprint për të prerë një kundërsulm në prag të pushimit (madje duke marrë edhe karton të verdhë). Tifozët e mbështetën duke thirrur emrin e tij, në kontrast me presionin që ra mbi disa lojtarë të tjerë.
Në pjesën e dytë, situata u qetësua pasi erdhën golat: Mbappé realizoi në minutën e 58-të dhe Asensio shënoi në të 65-ën. Edhe zëvendësimi i Asensio-s, i cili luajti me maskë për shkak të hundës së thyer, u shoqërua me duartrokitje të mëdha, si shpërblim për paraqitjen e tij. Vinicius vazhdoi të marrë reagime të ashpra në disa momente, sidomos kur zgjodhi të vepronte i vetëm në vend që të pasonte, por me kalimin e minutave fishkëllimat e fillimit nisën të zëvendësoheshin gradualisht me duartrokitje. Futja e të rinjve, si Mastantuono dhe veçanërisht Güler, i dha edhe më shumë qetësi atmosferës në stadium.
