Për më shumë se një dekadë, temperaturat globale po thyejnë rekorde, duke krijuar një normalitet të ri përballë thatësirave, uraganeve dhe zjarreve në pyje. Sipas të dhënave të fundit nga programi i Shërbimit të Ndryshimeve Klimatike Copernicus të Bashkimit Evropian, viti 2025 pritet të jetë viti i tretë më i nxehtë në histori, me temperaturat globale që janë mesatarisht mbi 1.5 gradë Celsius mbi nivelet paraindustrial. Kjo është hera e parë që një periudhë trevjeçare kalon këtë prag, duke alarmuar shkencëtarët për rreziqet e kalimit të kufijve të vendosur nga Marrëveshja e Parisit të vitit 2015.
Shkencëtarët paralajmërojnë se tejkalimi i këtij kufiri do të sjellë më shumë ditë me nxehtësi ekstreme dhe do të rrisë probabilitetin për përmbytje dhe stuhi shkatërruese. Gazrat serrë, të cilët thithin dhe mbajnë nxehtësinë në atmosferë, mbeten shkaku kryesor i ngrohjes globale. Laurence Ruil, drejtori i Shërbimit të Monitorimit të Atmosferës Copernicus, konfirmoi se aktiviteti njerëzor është nxitësi kryesor i temperaturave ekstreme që po vëzhgojmë, me nivele të gazrave serrë që janë rritur vazhdimisht gjatë dekadës së fundit.
Shtimi i tensioneve ndodhi më shumë gjatë viteve 2023 dhe 2024, kur një El Niño veçanërisht i fortë rriti akoma më shumë temperaturat globale. Ky fenomen klimatik, i cili ndodh çdo disa vjet, “shton” nxehtësinë nga oqeanet në atmosferë dhe kontribuon në përkeqësimin e situatës.
Kjo situatë alarmante tregon se disa nga pasojat e ndryshimeve klimatike tashmë po bëhen të zakonshme, duke rritur nevojën për veprime urgjente për të zbutur këto efekte dhe për të mbrojtur ekosistemet dhe shëndetin e njerëzve. Pjesëmarrësit në konferencat ndërkombëtare mbi klimën janë të ftuar të rishikojnë strategjitë e tyre dhe të angazhohen më vendosmërisht për të arritur objektivat e reduktimit të emetimeve të gazrave serrë ndryshe rreziqet do të rriten për të gjithë planetin.
