Faza e dytë e marrëveshjes së armëpushimit në Rripin e Gazës pritet të nisë në fillim të muajit janar, sipas burimeve zyrtare të cituara nga media izraelite.
Sipas televizionit izraelit Channel 13, Përfaqësuesi Special i Presidentit të SHBA-së, Steve Witkoff, ka informuar Izraelin dhe ndërmjetësuesit ndërkombëtarë se zbatimi i fazës së dytë të planit të armëpushimit do të fillojë në javët e para të janarit.
Një zyrtar i lartë izraelit, i cituar nga media, ka shprehur shqetësimin se Donald Trump mund të ushtrojë presion që faza e dytë të vijojë pa çarmatosjen e Gazës, çështje kjo që mbetet një nga pikat më të ndjeshme të marrëveshjes.
Presidenti amerikan kishte njoftuar më 9 tetor se Izrael dhe Hamas kishin miratuar fazën e parë të armëpushimit gjatë negociatave të zhvilluara në Egjipt. Marrëveshja hyri në fuqi më 10 tetor, pas miratimit nga qeveria izraelite.
Pavarësisht armëpushimit, ushtria izraelite ka vijuar herë pas here sulmet në Rripi i Gazës, duke i justifikuar ato me arsye sigurie.
Ndërkohë, më 17 nëntor, Këshilli i Sigurimit i OKB-së miratoi Rezolutën 2803, të propozuar nga SHBA-ja, e cila parashikon krijimin e një force ndërkombëtare kalimtare deri në fund të vitit 2027.
Sipas rezolutës, Gaza do të administrohet gjatë periudhës së tranzicionit nga një organ jopolitik dhe teknokratik, nën mbikëqyrjen e një autoriteti të ri të quajtur “Bordi i Paqes”. Ky bord do të kryesohet nga presidenti amerikan dhe do të përfshijë aktorë ndërkombëtarë, mes tyre edhe ish-kryeministrin britanik Tony Blair.
