“Fiks Fare,” emisjoni i parë investigativ në historinë e televizioneve shqiptare, ka mbushur 23 vjet si një zë i fuqishëm për denoncimin publik. Që nga fillimet e tij, ky format ka sfiduar heshtjen dhe ka kërkuar përgjegjësi nga pushtetet dhe çdo formë abuzimi. Ai është shndërruar në një dritare për qytetarët që denoncojnë padrejtësitë, korrupsionin dhe shkeljet ligjore.
Gjatë këtyre viteve, investigimet e “Fiks Fare” kanë provokuar reagime të forta, duke çuar në shkarkime dhe hetime penale, si dhe duke sjellë zgjidhje konkrete për mijëra qytetarë. Ajo që e bën këtë emision të veçantë është reaksioni i shpejtë publik dhe institucional përballë faktëve të dokumentuara dhe dëshmive të drejtpërdrejta.
Suksesi i “Fiks Fare” bazohet në këmbëngulje, profesionalizëm dhe guximin për të thënë të vërtetën. Ai ka mbajtur ndezur dritën e transparencës, duke mos njohur kufij dhe hierarki pushtetesh. Investigimet e tij janë përqendruar nga zëri i qytetarit të zakonshëm deri tek zyrat më të larta të shtetit, duke treguar se përballë fakteve, askush nuk është i paprekshëm.
Gjatë 23 viteve të transmetimit, “Fiks Fare” ka ndërtuar një besim të fortë me publikun dhe ka fituar respektin e tij, duke lënë një gjurmë të pashlyeshme në historinë e medias shqiptare. Emisioni ka arritur të jetë një referencë për gazetarinë investigative në vend, duke u bërë një faktor i rëndësishëm në shoqëri dhe në mbrojtjen e interesit publik.
Në përvjetorin e tij të 23-të, “Fiks Fare” vazhdon të jetë aty ku e nisi: lider në investigim, në krah të qytetarëve dhe në shërbim të së vërtetës, duke dëshmuar përkushtimin e tij ndaj transparencës dhe drejtësisë. Kjo bënë që emisioni të mbetet i pazëvendësueshëm në peizazhin mediatik shqiptar.
