Ministri i Bujqësisë i Serbisë, Dragan Glamoqiç, njoftoi se Kina dhe Serbia po e thellojnë partneritetin strategjik në fushën e teknologjive hapësinore, të cilat ai i përshkroi si themel të industrisë moderne dhe një hapësirë të rëndësishme për zgjidhje shoqërore e ekonomike afatgjatë. Kjo deklaratë u bë gjatë seminarit të parë kinezo-serb mbi teknologjitë hapësinore në Beograd, ku u inaugurua edhe Qendra e Përbashkët e Inovacionit. Glamoqiç shprehu optimizëm se implementimi i këtyre teknologjive do të përmirësojë sigurinë ushqimore dhe do të rrisë qëndrueshmërinë e sektorit bujqësor.
Në takim morën pjesë gjithashtu ekspertë nga Instituti Politeknik i Harbinit, që kryen kërkime në teknologjitë hapësinore. Një tjetër zhvillim i rëndësishëm është dhe vizita e delegacionit të Qendrës Mediatike të Ministrisë kineze të Sigurisë Publike, që ka si qëllim shkëmbimin e përvojave në komunikimin me publikun. Ministri serb i Brendshëm, Ivica Daqiç, theksoi rëndësinë e një komunikimi efikas për të përballuar sfidat e sigurisë.
Deri më tani, Serbia ka një partneritet të fortë me Kinën, megjithëse është vend kandidat për në Bashkimin Evropian që nga viti 2012. Bashkëpunimi me Kinën është intensifikuar që nga ardhja në pushtet e Partisë Progresive Serbe. Kjo ka ndikuar që Brukseli të paralajmërojë Serbinë për nevojën e harmonizimit të politikës së jashtme me atë evropiane.
Disa marrëveshje dypalëshe janë nënshkruar midis Beogradit dhe Pekinit, përfshirë marrëveshjen për ekstradim dhe forcimin e bashkëpunimit në media. Kina është investitori i dytë më i madh në ekonominë serbe pas BE-së, me një shkëmbim tregtar që arrin 5.7 miliardë euro, ndërsa Serbia eksporton katër herë më pak në Kinë.
Pavarësisht se Serbia shpall një politikë ushtarake neutrale, marrëdhëniet ushtarake me Kinën janë në rritje, me blerje të sistemeve të mbrojtjes dhe dronëve kinezë. Disa shqetësime kanë lindur në SHBA, ku është thënë se Kina po kontribuon në destabilizimin e Ballkanit Perëndimor duke furnizuar armë. Presidenti serb, Aleksandar Vuqiç, ka njoftuar një vizitë të re në Kinë, pas disa vizitave të tjera të suksesshme.
