Real Madridi ka bërë një hap fals në javën e 13-të të La Ligës, duke barazuar 2–2 në fushën e Elches dhe duke lejuar që diferenca me Barcelonën të tkurret në vetëm një pikë.
Pjesa e parë u mbyll pa gola, megjithëse skuadra vendase krijoi më shumë raste dhe vuri disa herë në vështirësi mbrojtjen madrilene.
Elche arriti të materializojë dominimin e saj në minutën e 53-të, kur Aleix Febas finalizoi një aksion të bukur të nisur nga Germán Valera, duke e dërguar topin saktë në cepin e portës për 1–0.
Real Madridi u rikthye në lojë në minutën e 78-të. Pas një goditjeje nga këndi, topi kaloi në zonë dhe Dean Huijsen ndërhyri në momentin e duhur për të barazuar rezultatin në 1–1.
Por Elche reagoi menjëherë. Në minutën e 84-t, Álvaro Rodríguez kontrolloi një top në kufi të zonës dhe goditi saktë në shtyllën e majtë të poshtme, duke rikthyer avantazhin e vendasve në 2–1.
Madrilenët shpëtuan nga humbja vetëm tre minuta më vonë. Kylian Mbappé dha një asist të shkëlqyer për Jude Bellinghamin, i cili nuk gaboi përballë portës dhe barazoi në 2–2, rezultat që mbeti i pandryshuar deri në fund.
