Sot bëhen 5 vite nga tërmeti shkatrimtar që goditi Shqipërinë në 26 nëntor 2019.
Nga lëkundjet e tokës me magnitudë 6.4 ballë e shkallës rihter, humbën jetën 51 shqiptarë, mes tyre gra e fëmijë. Shënonte ora 03:54 e mëngjesit kur lëkundjet zgjuan qytetarët nga gjumi.
Lëkundjet më të fuqishme ishin në zonën e Durrësit, Thumanës dhe Laçit, ku dëmet në banesa ishin më të mëdha. Grupet e kërkim-shpëtimit të ardhura dhe nga shtete të tjera vijuan kërkimet për ditë të tëra, me shpresën për të shpëtuar sa më shumë jetë njerëzish që ishin bllokuar nën rënoja, shkruan IliriaNews.al.
Mbi 900 qytetarë mbetën të lënduar nga shembja e banesave. Shkolla, biznese, pallate e shtëpi private u shembën nga lëkundjet sizmike, duke lënë në qiell të hapur afro 20 mijë persona që duhet të përballeshin dhe me dimrin e ftohtë që i priste përpara.
Shumë persona u detyruan të shpërnngulen nga vendet e tyre, duke lënë pas gjithçka. Disa prej qytetarëve jetuan për muaj të tërë në çadra të ftohta dhe në kushte ekstreme.
Sot, kur kanë kaluar 5 vite nga ajo ‘ditë e zezë’ për vendin tonë, ka qytetarë që ende nuk kanë marrë banesat e tyre të premtuara nga qeveria falas.
