Numri i personave të plagosur nga tërmeti që goditi Turqinë ka arritur në 151, sipas njoftimit të zyrës së guvernatorit të Stambollit.
Shumica e tyre janë lënduar pasi janë hedhur nga lartësitë për shkak të panikut të shkaktuar nga tërmetet. Në një postim në platformën X, zyra thekson se nuk është raportuar asnjë viktimë dhe nuk ka pasur shembje të ndërtesave të banimit. Megjithatë, një ndërtesë e braktisur në lagjen Fatih është rrënuar.
Autoritetet shtojnë se furnizimi me energji elektrike, gaz, ujë të pijshëm dhe kanalizime mbetet i paprekur.
Ministri i Arsimit, Yusuf Tekin, njoftoi se shkollat në Stamboll do të qëndrojnë të mbyllura sot dhe të premten. Ai sqaroi se nuk është raportuar asnjë dëmtim i rëndë në objektet arsimore dhe se oborret e shkollave do të jenë të hapura për publikun si zona të sigurta.
Sipas ministrit të Brendshëm, Ali Yerlikaya, pas tërmetit kryesor me magnitudë 6.2 që goditi të mërkurën, janë regjistruar gjithsej 51 pasgoditje, ku më e fuqishmja ka arritur magnitudën 5.9. Yerlikaya shtoi se tërmeti i parë ishte regjistruar rreth shtatë kilometra në thellësi dhe kishte zgjatur 13 sekonda.
