Policia ka vënë në pranga ditën e sotme dy të rejat, të cilat banonin në apartamentin që u përfshi nga flakët ditën e djeshme.
Sipas uniformave blu, dy vajzat akuzohet se për shkak të pakujdesisë kanë shkaktuar zjarrin që dogji apartamentin që ato kishin marrë me qira si dhe apartamentet e fqinjëve. Nga tymi, u asfiksua dhe një banor i pallatit, i cili aktualisht ndodhet në spital.
“Specialistët për Hetimin e Krimeve të Komisariatit të Policisë Nr. 2 arrestuan shtetaset K. Sh., 25 vjeçe dhe S. Gj., 25 vjeçe, pasi dyshohet se për shkak të pakujdesisë së tyre, ka rënë zjarr në banesën e tyre. Si pasojë janë dëmtuar banesa e tyre dhe banesat e fqinjëve. Gjithashtu, është dërguar në spital, shtetasi A. K, për shkak të asfiksisë, jashtë rrezikut për jetën.”– njofton policia.
