Zjarret e mëdha që kanë përfshirë disa zona të Francës kanë zbuluar qindra predha të mbetura nga Lufta e Dytë Botërore, duke detyruar autoritetet të ndërhyjnë për heqjen dhe asgjësimin e tyre. Shpërthimet e zjarreve kanë djegur shtresat e bimësisë dhe tokës që për dekada kishin mbuluar municione të pashpërthyera, të mbetura nga betejat e konfliktit të viteve 1939–1945.
Ekipet e specializuara të ushtrisë franceze për çaktivizimin e eksplozivëve janë angazhuar për të siguruar zonat e prekura, pasi predhat e vjetra paraqesin rrezik për banorët, zjarrfikësit dhe punonjësit që po ndërhyjnë në terren. Disa prej municioneve datojnë nga bombardimet dhe luftimet gjatë çlirimit të Francës.
Ekspertët thonë se zjarret, përveç dëmeve mjedisore, mund të nxjerrin në sipërfaqe edhe objekte të harruara prej dekadash, veçanërisht në rajonet ku janë zhvilluar beteja të mëdha gjatë Luftës së Dytë Botërore. Autoritetet u kanë bërë thirrje banorëve të mos prekin objekte të dyshimta dhe të njoftojnë menjëherë shërbimet e emergjencës.
