Një zjarr ka përfshirë mesditën e sotme zonën e Ujit të Ftohtë në Vlorë, pranë tunelit, çka ka rrezikuar përhapjen e flakëve në një zonë të banuar dhe të frekuentuar nga turistët.
Flakët kanë përfshirë një kabinë të ujësjellësit, e cila përdoret për shpërndarjen e ujit në këtë zonë. Sipas informacioneve paraprake, zjarri dyshohet se ka nisur në pjesën kodrinore dhe më pas është përhapur në drejtim të kabinës.
Menjëherë pas njoftimit, në vendngjarje kanë mbërritur forcat zjarrfikëse, të cilat kanë nisur ndërhyrjen për izolimin e vatrës dhe parandalimin e përhapjes së flakëve.
Situata ka krijuar panik për shkak të afërsisë me banesat, hotelet dhe objektet e tjera që ndodhen në zonën e Ujit të Ftohtë, veçanërisht në këtë periudhë të sezonit turistik.
